ಸಾಮಾನ್ಯವಾಗಿ ನಮ್ಮ ಸುತ್ತಲೂ ತಿರುಗುತ್ತಿರುವ ಸಂಗತಿಗಳು ಕೆಲವಿರುತ್ತವೆ. ಸಕಾರಾತ್ಮಕವಾಗಿ ನೋಡಿದರೆ ಅವು ಲಾಭಪ್ರದ. ನೇತ್ಯಾತ್ಮಕವಾಗಿ ನೋಡಿದೆವೋ ಅದು ಆತ್ಮನಾಶಕ್ಕೆ ದಾರಿ. ಬೇರೆ ಬೇರೆ ಲೇಖನಗಳಲ್ಲಿ ಈ ಸಂಗತಿಗಳನ್ನು ಬಸವರಾಜ್ ಅವರು ‘ಇಷ್ಟೇನಾ ! ‘ದಲ್ಲಿ ಹೃದ್ಯವಾಗಿ ನಿರೂಪಿಸುತ್ತಾರೆ. ಸರಳ, ಸುಂದರ ಹಾಗು ಆಹ್ಲಾದಕರ ಬರವಣಿಗೆ. ಸಂತೋಷ ಮತ್ತು ಮನೋವಿಕಾಸ ಎರಡಕ್ಕೂ ದಾರಿ ಮಾಡಿಕೊಡುವ ಬರವಣಿಗೆ. ಈ ತರುಣ ಮಿತ್ರರಿಗೆ ನನ್ನ ಹೃತ್ಪೂರ್ವಕ ಅಭಿನಂದನೆಗಳು..

ಚೀನಿ ತತ್ವಜ್ಞಾನಿಗಳಾದ ಲಿನ್ ಯುಟಾಂಗ್ ಅವರ ‘ ದಿ ವಿಸ್ಡಮ್ ಆಫ್ ಇಂಡಿಯ‘ ಹಾಗೂ ಕನ್ಫ್ಯೂಷಿಯಸ್ ಅವರ ‘ದಿ ವಿಸ್ಡಮ್ ಆಫ್ ಕನ್ಫ್ಯೂಷಿಯಸ್’ ಇಂತಹ ತತ್ವ ಗ್ರಂಥಗಳನ್ನು ಓದಿದಾಗ ಆದ ಆನಂದವು ‘ಇಷ್ಟೇನಾ!‘ ಓದಿದಾಗ ದೊರಕಿದೆ. ಬಸವರಾಜ್ ಅವರು ಸುಂದರ ಜೀವನವನ್ನು ಕಟ್ಟಿಕೊಳ್ಳುವ 40 ಬಗೆಗಳನ್ನು ನಮ್ಮ ಮುಂದಿಡುತ್ತಾರೆ. ಇಷ್ಟೇನಾ?… ಎಂದು ಓದಿನಲ್ಲಿ ತೊಡಗುವ ನಾವು, ಕೃತಿಯ ಓದಿನ ಕೊನೆ ತಲುಪುವಷ್ಟರಲ್ಲಿ- ಆಹಾ! ಎಷ್ಟೆಲ್ಲಾ ಪಡೆದವಲ್ಲ…! ಎಂದು ಕೃತಾರ್ಥತೆಯಿಂದ ಮಾಗುವಿಕೆಯ ಪಕ್ವತೆಯನ್ನು ತೋರುವುದು ನಿಶ್ಚಿತ!

ನಲವತ್ತು ಅಧ್ಯಾಯಗಳ ‘ಇಷ್ಟೇನಾ!’ ಒಂದು ರೀತಿಯಲ್ಲಿ ವ್ಯಕ್ತಿತ್ವ ವಿಕಸನದಂತಹ ಪುಸ್ತಕಗಳ ಸಾಲಿಗೆ ಸೇರುವಂತಹ ಕೃತಿ. ಆಡು ಭಾಷೆಯಲ್ಲಿ ಹೇಳುತ್ತಾ ಹೋದಂತೆ ಇರುವುದರಿಂದ ಓದಿಸಿಕೊಂಡು ಹೋಗುತ್ತದೆ. ಬಸವರಾಜ್ ಅವರು ಒಳ್ಳೆಯ ಪ್ರಯತ್ನ ಮಾಡಿದ್ದಾರೆ. ಅಧ್ಯಾಯಗಳ ಹೆಸರುಗಳು ಆಪ್ತವಾಗಿ ಒಪ್ಪುವಂತಿವೆ. ವಿಚಾರಸರಣಿ, ಶೈಲಿಯ ಓಘ, ಸರಳ ಶಬ್ದಗಳ ಬಳಕೆ,ಲಘು ಹಾಸ್ಯ, ಉದಾಹರಣೆಗಳು, ಸಂದರ್ಭಗಳು, ಇತ್ಯಾದಿ ಸಮಯೋಚಿತ ಮತ್ತು ಶ್ಲಾಘನೀಯ. ‘ಇಷ್ಟೇನಾ!’ ಓದುಗರನ್ನು ಸೆಳೆಯಬಲ್ಲದು.

ತಮ್ಮ ಅನುಭವದ,ತಾವು ಕಂಡಿರುವ,ಮತ್ತೊಬ್ಬರ ಮಾತುಗಳನ್ನು ಕೇಳಿಸಿಕೊಳ್ಳುತ್ತಾ ಅನುಭಾವಿಯಾಗಿ ಬದುಕಿನ ಮಗ್ಗುಲುಗಳನ್ನ ಸ್ವತಃ ತಾವೇ ತಿರುಗಿ ನೋಡಿ, ಪರಿಷ್ಕರಿಸಿ ಬರೆದ ಪದಗಳ ಗುಚ್ಚ ‘ಇಷ್ಟೇನಾ!’
ಟ್ಯಾಗ್ ಲೈನ್ ಗಳನ್ನು ಬಳಸಿ ಒಂದೊಂದೇ ಎಪಿಸೋಡ್ ನಲ್ಲಿ ಬರೆದ ಸಣ್ಣ ಸಣ್ಣ ಅನುಭವದ ಅಕ್ಷರಗಳು ಓದುಗರನ್ನು ಎಚ್ಚರಿಸುತ್ತಾ ಹೋಗುತ್ತದೆ. ನಿತ್ಯ ಜೀವನದ ಅರ್ಧಸತ್ಯಗಳ ಪದಗಳ ಗಂಟಿನ ಮೇಲೆ ಕಣ್ಣಾಡಿಸಿದರೆ ಮನುಜನ ಅಂತರ್ಮುಖದ ದರ್ಶನ ಆಗುವುದು ಗ್ಯಾರಂಟಿ. ಹೇಳಬಹುದಾದ,ಹೇಳಲೇಬೇಕೆಂದೆನಿಸುವ ಬರಹಗಾರನ ನುಡಿಗಟ್ಟುಗಳು ಕೆಲವುಸಲ ಸಿಹಿ ಊಟದಂತೆ ರುಚಿಯಾಗಬಲ್ಲದು, ಕೆಲವುಸಲ ಹಾಗಲಕಾಯಿಯಂತೆ ಕಹಿ ಎನಿಸಬಹುದು. ಆದರೆ ಬದುಕಿಗೆ ಇವೆರಡು ಮುಖ್ಯವೆನಿಸಿ ಇಷ್ಟೇನಾ! ನಮ್ಮ ಜೊತೆ ಇರಲೇಬೇಕಾದ ಆಪ್ತ ಗೆಳೆಯನೆನಿಸಿಬಿಡುತ್ತದೆ